MY SECRET OPEN DIARY

Ei tao dâh tyhpa hawhta dawh 10 PM a vaw paro ha nahta cha thopi sai doh heih awpa ta apachhuahpanoh na ta, chakua kaw hrasala ei rakhô puasaipa ta chôkâh lâ ei pangai

Thopi ei tao khai nahta rakhô lâ vaw kua heih na ta - rakhô chô lia thopi doh awpa ta. Chata ei vaw tyuhpa cha 'Khre' tahpa pyu ei vaw thei ha. A chatlie kawpa ta ei chao avaw pahua hmâ tarawn'ta ei 'Mobaina' cha heih lyu leipa a vaw châ hawh. Pei tah kaw hrasala yzie hnei khao leipa a châ hapa vâta pahno leipa ei pachâ rua rua( hehe).

Mydi ei thyupa tawn'ta class lâ va râ lyma na ta, mobaina leipa ta Class lia ei za tyuh hlâhpa cha takô a chakai leipa ta lyu thlyu lâ sie hapa nata a vaw miakha hlâh ha bâ. "Khi khi khâmaw?"tahpa saita ei viasapaw hiahripa ta class ei vaw bâ ha hra.

LYMÂ DAOPA EINA BYUH KAW HRA

Pachâ nahta na byuh kaw tyh hrapa la chyhsa alâ patluap'enawh - a thai patluapa-nahzy, Writer rôhnahpa-nahzy, Sportsmen rônahpa nahzy, riahpha patluapazy nata  khihtlâh châta nata râh châta hmo phapa nata moh pathâna a tlôkheituhpazy cheichalona nata palyupalihna ‘Award’ ama pie tyhpa, India râh châ sala Bharat Ratna zy,  Padma Bhusan zy et al; a khizaw pôhpalôhpa(International) lia châ sala Noble Prize zy a châ aw. Cha lymâ rônah ngaitapazy cha dao awpa byuh paru kawna ei hnei hra – pie pakhua awpa ta.

Cha hawhpazy vaw reih hra na ta, nama pahneizy taihta a chhi pâ ngâkaw ngyu aw; thokha chhochhi la a lyu lei tupa vâta nama hie taihta chhao a hâh pâ ngyu thei aw; “â hâti palôhru ny tlâ a rei hra bao” thokhazy nama vaw tah pâ ngyu thei aw. Kei, thaina nata sona a hnei leipa he hawh lymâ dao nawpa sâkha hmah y leipa ta, dao beih va na aw tahpa ei pahnopasia ngaita kaw. Lymâ rônah kawpa ama hlâ khai tawhta ama lâ pakhua hapa chhao rei awpa a y hôlô. Indian Writer thai-patlua-chônô Puh Khuswant Singh (L) deikua a lymâ rônah kawpa a pie pakhua. ‘Dirty Old man’ hela paw nota lei ly a châ.

ATYUNA CHHAO Y LEIPA SCHOOL KHAWH!!!

School hropazy lyu lei kawpa ta Bench nata Desk hmô awpa y mah vei, pachutuhpenawh Office liata kuhva nie ta chahnamei pazy pâ ta phei chalyu ngâkawpa chhao hmo awpa y mâh vei. School to va ngia sila, school hâti nah ta ama roh chakhyna hmô awpa a y cheingeih aw - School pâchhôh nata Desk lia. Chadei châ vei, school tlô chy lia maih ta Signboard lia tlyma; school hmia liata tlyma ama school moh, motto nata hmo hropa kha nata khazy tlyma a ro chyu aw. School ama pahy tua noh vaw kiah parohpa nata vaw kiahthiepa nah chhao bie a chho ei ta, vaw kiah parohpa nah deikua sukha lia y pahmao ei ta, chapaw thokha a hnôh chai lia ama tyuh heih aw. Chatacha, vaw kiathiehpenawh mo chakhie cha-ei ei ta, a châh ta a paro ka che ta thokha pahnei pyu theipa chhao a y aw. A palaihsasa viapa nata a pasatliasa viapa thokha nah chhao "vaw kiah thiehpa nah lia hmiphapa ama y ma?" tah palôhru ei ta; thokha ta "ahmipha dâh; a chhie lei hra; kho a pao dâh he paw/nô he la" vaw tah ngâkawpa chhao ama y chyu aw.

EI MOBILE PHONE

Khazoh ngiachhiena vâta tlâhna nata hrise phana to hmeiseih na ta, ei vaw pitloh tawhta Hospital liata ypâ na taihta  tlâh  leipa he hnei mâ hrao na. Noh nata daihtizy sie lyma ta pahno lei chhôhta  High school ei vaw kiah pathao ha bâ hra.  Khizaw thaina nata sona chhao hmasiena ta vaw pazi ta noto nata minute to ta a sosâh lyma hra, ei hro nata ei hmo khohpa chhao anano pathao lyma hra; ei byuhpa nata ei ngiahpa chhao. Ei peimawhpa hlâta ei khohpa ei tly ngâthlâhpa deikua anano mâh hlei vei; a khâpa rai châsala heilyuna chikha na tlâ châ hra bao tah tyh na ta, ei tah lyma chhao apangiasa na ta, ei ngiapâ thlâh-thli pâ hra.

AHYZY MAW MIZO CHA?

He chôchâh he mawrâh liata apahrâpa eima châna hawhta â eichhiana chhao hlu ngaita ta, chavâta ahy zy tlai he maw MIZO he atah awpi. Ei pachâ dâh ei vaw roh awpa châ ta, pachâ lei lâta tlyma' apha leita tlyma nata ahaona tlyma eima la tlâ lei awpata ahmiatuah chaita ei chahaw ei. Ei kha n'awpazy a châ pavâta ei Mara reih zy chhao reih ru kaw awta, tiama papuata nama vaw reih patlô cheingei awpa ta ei châ haw ei.

 Mawrâh liata pihpa nata laiseihpa he cha maw reih eima thai khai tah theipa a châ. Kô 1961 hmialâ kha cha atahmâ ta maw reih vaw châ hapa LUSEI(Duhlian) he 70% ta eima hmâh, atahmâ deikua 95% lâta avaw pôh haw. A y zie cha maw reih hmâtuhpa eima pôh lyma tahna a châ. Radio nata chârona liata Missionary nah zy ta ama vaw hmâh tuapa vâta chhao a châ thei aw. Khâpa vâta Mizo atah khoh leipa maw eima châ? Maw rah liata Mizo atah khoh leipa eima y hôlô, apachâita Mara, Hmar, Lai nata Paite zy ama châ. He nahzy he Culture, reih nata Hawhrawh( A AW B) taihta âmo eih ta hnei eita, Bible nata Hlabu chhao âmo eihta ta ama hnei chyu hra.Deikua âmo eima maochhie hlâta khapa vâta Mizo atah khoh leipa maw ama châ achhâ(Reason) eima mo tua aw.

NA MOH CHHÂNA LÂ LIATA ' L' (LATE) TAHPA TA AMA BAI NGÂTHLÂH HA BÂ AWPA HELA PASAI THEI MUARUA NA!

(Tribute to T.A. Hrothie).

Dawh 11:15 AM lia ei phone cha vaw paro ngâkaw ta, ahymaw na vaw call tah palôhru na ta, chatacha ei phone kei mo nahta ei  Puh Zawngia ( Keinô nawhta) vaw châ ta, Delhi lâ ei kaw zu tawhta bie eina chho beih leipa vâta eina vaw chho hrapa a châ hih tahpa hlâ khala, 6th July, 2017 noh tawhta tlâh lei pathao hapa, ei viasapaw , ei puhpa nata ei unawhpaw T.A Hrothie cha ei palôh lia vaw lâ ta, chihupa na chô ta phone cha la( Pick up) na ta ' Beiku, Athia( T.A Hrothie) cha atahmâ tlâi khaw ahu achhâ' na vaw tah hlâhpa la chapaw kô 19, Awhsi tlana râh liata ano deita, chihupâ na chô ta O tlôh ngakawpa châtala pahnothai ru hmeiseih. Ei pôhhmi cha ei khapi ta pahnolei chhôh ta vaw duah ta, pachâna pasipi na pie ta thlazohna nata chihuna ei palôh lia ryu a rei.