EI MOBILE PHONE

Khazoh ngiachhiena vâta tlâhna nata hrise phana to hmeiseih na ta, ei vaw pitloh tawhta Hospital liata ypâ na taihta  tlâh  leipa he hnei mâ hrao na. Noh nata daihtizy sie lyma ta pahno lei chhôhta  High school ei vaw kiah pathao ha bâ hra.  Khizaw thaina nata sona chhao hmasiena ta vaw pazi ta noto nata minute to ta a sosâh lyma hra, ei hro nata ei hmo khohpa chhao anano pathao lyma hra; ei byuhpa nata ei ngiahpa chhao. Ei peimawhpa hlâta ei khohpa ei tly ngâthlâhpa deikua anano mâh hlei vei; a khâpa rai châsala heilyuna chikha na tlâ châ hra bao tah tyh na ta, ei tah lyma chhao apangiasa na ta, ei ngiapâ thlâh-thli pâ hra.

Eima hâti via no( Tlâ vaw tah hra tua sa, eima hâti via no châ tlô ta e)  ta eima khoh chaipa nata eima byuh chaipa hry liata Christmas chy ta eima Bazaar tyhpa he pahlao lei theipa châ vei aw.  A dyhna bei a pih awpa vâta  moto, alai-achy, riethei tawhta hneirôh chai taih chhaota eima buakhei chai tyhpa kha a châ tah sa la reih chhei ngyu va na aw. Keima chhao ta na byuh chai tyhpa la Pistol nata Helicopter nothlahpa(Toys) a chalei cheingeihpa khaw ei pachhuah chaipa a châ tyh hra. Kei nô deikua ahria-hrâ awpa liata phusa eima pahryu tyhpa deikua thata paphôh tyh ta, deikua khatlu ta hmah paphôh hrasala achhâ chhâ lia deikua la a sawchapaw khohpa chalei lei awpa ta Christmas ahmâh awpa deikua â thai ngâsâ  leipa vâta achaipai liata phusa cha i ngaita kaw tyh hrasala  athua ha thlâh tyhpa kha a châ. Tlai na!!! Christmas hela ahy chhao rai pasô pita, eima ly. A pachaita thotlâh hâti nahzy châ  chhochhi la Siaha hmôna daihti ryhpao chaipa( Golden Chance) a châ mâh ta. 

Zâkô lâ via, Date 15^th December,2017 noh ta Lôpu khih chyhsa chô lâ liata hmo tlôpa kha rei lei thei va na. Eima Bei Zisu pihna daihti chhôhkha âki kawpa ta hmâhpa saduthliena chô ta nata hâti-nahzy kho-tlâpazy tao/chalei awpa ta supi (Siaha) lâ ama pangai daihti liata ramâ lâ chhao ta ama hmô pha lei awpa (?); saduthliena lia chhao ta saduthlie beih lei awpa hmo ama tyhpa kha la apiepasipa(Accident penawh) chhôhkha-sanawh nata khih-tlâh awnanozy châ hupo âchhi va dâh chi, tah tyh na ta, ei tah heih tyh mâh ta.

He ama piepasina su he Siaha thlahchhâna su tawhta short-cut lâthlôh akaw siepa, ABC Home tlô chy liata achakhâna chaina su kha châ ta,Sumo liata chyhsa pahrawh hleithôh(13) ama kiah vâta Sumo ta pahnie leipa ei ta, âkhaokhei  ha eipa kha a châ. Eima Council liata eima nôpaw nahzy Sumo liata pahrawh hleithôh (13) po kiah byuhna taihta eima sievawna Motor a dai leipazy he palôh liata patuapalua chi a châ hmeiseih. Nama Gypsy, Car, Bolero etc. thiehpa sai pachâ ta a râh hrei chi châ khao vei – ‘Cheat' Executive Member nata a sahlao-nahzy saih u. Cha cha, ei palôh liata avaw lâh hnai ta, a chy ta ei vaw zie pâ.

Kô hro Christmas Bazaar noh maih ta Pistol  nata Helicopter nothlahpa(Toys) haw tyhpa kha , Kô 2012 December thla liata eima Bazaar no deikua la Pistol nata Helicopter nothlahpazy la haw khao na, “ Kei nô atakô la khâhmah khoh na, deikua MOBILE PHONE na chaleipa ula â daih” ei tah noh ta einâ hmi khaw a vaw nano khaita , ei hluhpi “Ei saw MOBILE PHONE  liata phusa hluhpi tlâ ei pahryu awpa dua maw ei vaw pasai lei ngâsâ” na tah ta, deikua phone ei khohna kha eina pangâ khai ha tawhta cha bâhsaipa ei pachhuah hlei hra vei. Ei hluhpi chalei lei awpa ta na chho ngâkaw hrasala a chhâ chhâna lia deikua eina chalei hapa  kha a châ. Ei Phone cha CELL WORLD, New Colony liata eima chalei, amoh cha ASHA 305( NOKIA)  a châ.

Kha daihti no kha, Mobile zy cha hawhta hmâh phahnai nawpa kha y hrao mâh vei( a dâh tlâhpi saipa ta), a chhâpa la a zaw-mârâ ta mobile hnei mâh vei ei, atahmâ ta eima hnei hawhta hih. Khôpai lia chhochhi la Signal hmah y mâh vei. Cha hawh duasu a châ no ta, MobIle Phone liata asâh hluhpi pahryu awpa ta, keino (A. Nolaw) eina chho pasao ngâkawpa kha maochhie âchhih bao vei, thotlâh nô châ ta  la. Hmo sâkha, daihti reipi asie ha tawhta ei pahnei na pachhi heih tyhpa la, Khôpai paw liata kei paw ( J. Lekhaw) nata a unawh paw(Eipaw laipa; J. Khili) he phone hnei tuah py ama châ leipa chhao ta, top 10 lia ama hlao cheingeih nahta ei pangiasa,  anodeikua 'Mobile Second hand’ rairie ama hnei, ama unawh ta. Keipaw eih he Nokia(Black & White pua tua chai py a châ ta ei pahno) châ ta, ei paw laipa eih deikua Sony Ericson a châ, a rô hmahta thi rôh( Maroon) a châ.

Noh nata daihti sie lymâ ta Cl-XII final eima exam lihchih nohta scholarship ei la hra na vâta nata Cl-XII zy ei pass khiahta cha College zy kiah bâ hra awpa ei châ hnai ta XOLO  cha Flipkart liata bie ta na ta, Blue Dart, Vaivakawn Road, Dawrpui, Aizawl  lia vaw tlô ta, ei visapaw L.P. Remthangpuia ( Lawngtlai) nata eima kei la pa kha a châ, he he March 2016 liana kha a châ. Atanoh taita KHAZOH ngiachhiena vâta Phone chhiehrupa he la ei pôh pachia sâkha hawh a vaw châ ha bâ hra.

'Anodeikua’ vaw tah tuasa la, Phone he ei hmâh phahnaina kyh  hluhpi a y – a chuna vâta nata hmo hropa vâta su hlapi liata ei y daihti liata ei chhôhkha nah biechhona châ ta zy, ei viasapaw biechhona châ ta zy, ei viasanô nata ei viasanô hlâta asâh viapa, vâchhie J.Vialua(L) châ mawh sala, ‘Lôdunô’ a tah cheingeih aw, châhrasala eima chhothaipa(Rapper) Joel Mychhua Nôhro a.k.a Lil’Joe deikua  ‘D’zuah” atah; a sano ta ' Kha tla tlyma' ama reina dâh angia ei tah rairie kaw , bie a chhona châta ei vaw hmâh tyh.  khizaw liata MOBILE PHONE   he y leipa sala atahmâ ta ei duasu nata duahmo hlâta ei tlô pasâh via vâ tlyma  tahpa deikua ei yru châh ta ei hiahhrina dei avaw châ haw. Khai!!! Nozazy na a vaw chhih pâ, Benson Syhly zy, Joel  Mychhua Nôhro zy ,Gospel  Thâlai Nôhro nata  Delson Nôtlia zy ‘Digital Market’ tah ei ta, ama youtube channel ‘Monetize’ ei ta phusâ dawhkiah kha dawhkiah kha thla to ta ama  la pangia ngâkaw no ta, cha hawh ei vaw reih cha la. Delson Nôtlia chhochhi la Kô 2017,12^th  November  lia khawh Grammy Award châ leipa ta, Mara Christian Fellowship, Delhi( MCF)-zy ta Christmas Advent eima hmâh no ta ‘Best Youtube Channel  Award’ a vaw dao hapa a châ.

Reihpa ei my tlamaw heih chu, mongyureih nata Hindi nata hmo ei pahno leipazy, he Mobile tawhna heta MC.,Dr.,Rev.Prof, Er.,Puhpa Google liana heta a sao hia tyh na ta, eina pahnai kaw tyh he kao nano nano liata, Computer pahro(On) byuh leipa ta rai nao kawpa eima ziana tawh ei khohpa mai ei tlua thei lyma. 

******** J. Beikuzô *********