TLUANG TAKIN AW, TLUANGA!

Kawng engkima ka aihnahphapui ka nau pawh ni lo ka ṭhianpa, C. Hmangaihtluanga (Iphone a nei hnua 'Mike'-a ni ta), nen kha leh chen Delhi khawlum hnuaia zirna avangin  kan tal dun a, tunah erawh a haw a lo ngai ta. Min ngai viau ang ka ring, kei erawh ka sawi dawn lo.

First Year kan nih kumah kan awm dan te ngaituah let hian lung a leng duh kher mai.  A ṭulna apianga nau zawk leh u zawk daidanna awm hauh lovin in rawnin kan in zawt tawn  fo. Ka nau mah nihse (a ni chuan keiin i naupang a ti ve le ang) ka fak lo thei lohna chu aia upa leh hotute zawk te a zah der thiam em em a; chutiang bawkin aia naute duat dan leh an u va theina turah awm dan a thiam em em hi ni ka ngawibopui phal lo chu. Pu Liandala'n  "Aia upate zahthiamin" ti hla a phuah vawikhat pawh a ngaithlak phei zawng ka hre law.

Delhi-a a awm chhungin thil tam tak a zir chhuak ngei ang ti chu tlang hriata dah ila, thil tam tak a zir chhuah zingah  sawi lo turah uiawm deuh deuh te – Artui a kang thiam, chaw chhum (hei erawh amah bak tuma'n ei tlakah an ngai lem lohvin ka hria), Alu leh Arsa te pawh tui 'mangtara' chu ni lem loh mahse a ei tlak viau tawh e.

Nula chhaih thluk zawng a ngah ngang mai, keini bialnu la nei ngai lem lo tan phei chuan hahip miauhvin kan sawi thin, chu mi ai mah chuan a beih ngar ngar hnuah pawh a chhaih thluk zo lo hi an tam zawk an ti ( Sawitu : Hming thup). A ni chuan ka bum zo lo ho a ti thin. Engzat chia nge ni ang le – ka hre chak. Pu Mafaa'n "Rui chunga Online chu a fuh lo. Zing ka thova bialnu ka lo nei ṭeuh" a ti khan min phuah chhan a ti fo mai. In han zawt chian erawh "awi awm lo e" a ti ve leh ang a.Ka sawi zawm dawn lo, tu emaw tih dan takah min zawt nawn leh a ni chuan  'ka mit, ka beng ka hup'.

 Kan nau tho, amah inti dan takah Ls Pro ('Pro' hi Pro Pastor nge Professional tihna nge ka hre hlei thei lo, Prostitute tihna pawh a ni thei e),  Ls-a'n "Zak thei lo, in la zakzum" a ti hi  ka ṭawmpui e.

Mahse e, kha leh chen Mizoram-a 'englo' a nei a, tunah a haw dawn hnaia a nei lo tlat. Tu lanu in nge anchhia lawh che; vanduaina a va nih tehlul em! Muhilh hlei thei lova zan reia i suangtuahna (Dream) zawng zawng te ngaituah chian chuan a rilru natthlak a ni. Hamlet-a'na "Derthawnna tenawm, i hming chu hmeichhia a lo ni hi" han ti mai te pawh kha i hrethiam sawt lo maw?

A ei rawngbawlhna Gas stove hmu hman lo ho kha chu American Stand up comic leh Writer Tig Notoro iangin "I'm the luckiest unlucky person" inti mai r'u. Hmu phat aṭanga " Tluanga, bawlhlawh mi in hmeh ṭhin a?" han ti mai kha a awl. A Gas Stove hmel fel fai fek fawk dan tur chu in hisap thiam mai em?  "Tu pawh beng neih chuan hre rawh se" (Matthai 13:9). Sweet Corn ka ei thin a ti tak nain Sweet Kawr a ni duh hmel viau ta mai.

Tak tak-ina,"finna a nasat poh le buaina a tam a, hriatna a pun poh leh manganna apung" (Thuhriltu 1:18) ti hi hre reng chungin i nunkhua hmang zel la, khawvela mi hlawhtling ber ber te hi a tirah hrehawm tinreng tuar a, beidawnna khur thuk tak atanga beiseina eng chheh te lo eng  pan hram hramtu te an ni tih hre reng la, Brazilian hmuipuipa Paul Coelho-a'na  "midang lakah 'aw' i tihna lamah khan, nangmah leh nangmah kha 'aih' in ti suh ang che" a ti ang khan mi zawng zawng tih-lawm tum suh ang che. Chu chu hlawhchhamna chabi a ni si a. Mi zawng zawng lung tih-awi tumte hi khawvela mal leh khawhar ber ber an ni fo.

"Kei grep hrui chu ka ni, nangni a pengte chu in ni; tu pawh keimaha awm reng a, keipawh amaha ka awm rengna chu, chu mi chu tam takin a rah thin a; a rah apiang a ati thianghlim  thin, a rah tam lehzual nan" (Johana 15:5)  titu Lal Isua chu kawng tin renga i hma hruaitu leh kaihruaitu lo ni zel turin sawm la, khuareia Lal Isua iangin  vanvadak a "Ka pa, ka thu i ngaithlak avangin i chungah ka lawm e" (Johana 11:43) tiin thil tinreng Siamtu hnenah ṭhingṭhi miauhva lawmna mittui (Tear of joy) tla zui zui chunga lawmthu i sawi mawlh mawlh hun a lo thleng ngei ang.

"Hreh tak chunga Mangṭha ti tur nang ang thian rintlak leh rinawm ka nei che hi ka va nihlawh  em"   A.A . Milne-a'na (Winnie-the –pooh) a ti ang khan ka lawmna van sang zia hi ka sawi chhuak fo vang, ka ring. Tluang tak zel in aw, Tluanga. Hasta La Vista, Boy.