Kô 1996 liata Puhpa A. Thazi, Siaha Vaihpi phipa tahpa hleikhô a thâtih hropa rei awpa pahno va na. A. Thazi he chanô maw a châ chapaw maw, tahpa chhao hmah a tliata lia ei pahno, chatlupo cha na ei pahno lei chu(h). Art he rônah ta, parôhnasatuhpa hry liata ahlao hrapa vâta Mara paw hry liata eipa 'Gunda'-sa chai py a châ hra.
He hla a phi no he a satlia ma, dyhchâ khôphei akiah ha ma tahpa pahno hlei leipa na ta, hla tawh eima sai khiah a satlia hlâ chy tahpa alâ. A chanô - a awhsi nô - he râh hro lâta raihria awpa ta siesai hapa a châ lei khiahtala, a chuna vâta viarâh liata a a chây-sai hapa a châ cheingei aw.
He hla he satlia nata laihsa, daihti ta a pachhai hapa, â khoh rairie hlâ eita ta, a chuna vâta akao kho awpa ary leipa a châ na ta pangiasa âchhih. Cha hleikhôta, akho pathla mâh hlei leipa ei ta, viasa thokha hlâta hluh viapa deikua ama dia pathao ha bâ, âmo likah liata chhao kha tlyma la a y cheingeih bâ hra aw, a chapaw palôh chhao viavi pathao kaw bâ hra nahta pangiasa âchhih. He hawh daihti no zâ lâ ngaisipa chhao a 'nuam' kaw. Ngai a sina mâ a y hâ hnai ta.
Khata a lôdunô aza siesaipa kha a palôh âlie ta, a viasa nah kiah lia chhao y ho lei ta, viasa nah nata khiliah lia chareipa hlâ kha la a khôphei chô tawhta a khonô hnazô nai zualua mothlawpa â tly via tahpa alâ. A hmi pha ngaita kaw na ta ei pangiasa. Hmô hrapa eina byuh kaw.
A khonô siesai hapa nata he viasa pha kawpa ama châ na ta chhao ei pangiasa, zâ charei ta a chhôso pahnie awpa ta noh tla ta a vaw zoh pathaopa taw nahta charei tyh cheingei ta chhao lyu ta, a charei zâto vâta chhao a châ ngyu aw, he tlupo ta apalôh âliena chhâpa hi. Tlâh ta ama yna pachhai ha tlôh.
A sie zâ chhochhi la lyubie toti a hlâ khai ha bâ mâh ta. He zâ chhochhi la o lâ di awpa rai apalôh lia a y khao nahta pangiasa va na. A di hapa chhao hmah châ sala ei kha hmah paso(â mô) leipa ta pachâna lia chareipa ta khih apadei hlâh pyly aw. A awhsi nô sie awpa pasaih leina nata lôliena ta a chhôso liamari lia ryu arei cheingeih hr'aw vei ma. Kao khala tala ei palôh ei na vaw lie khei hleikhô ta, ei vaw 'feel' kaw hra.
A chanô sie tawhta hata ei khanazy chhochhi la lôliena ta khizaw hmâh aw ta, a yru ngaita kaw thlyu aw. Alôlie vasâh tu ha nahta cha a khonô chareina tlâh a o tawh sai ta, akhonô yna tlâh deikua meichho kurupa dei leita khâhmah hmô thei tlôh va. Vâ apasa ngaita kaw thlyu na. Zâto chôthlapinô vaw ry liata a hi laipa dei leipa ta tao theipa hnei tlôh va, yru âchhih vâ dâh chi!!! A khizaw a tho ngaita kaw nahta ei pangiasa cha maw.
Kha daihtino ( ei pih mâh hlâ - 1996) kha Internet Khizaw a châ mâh lei hnai ta, Facebook, Whatsapp etc. tawhta zy bie â chho nawpa kha y mâh vei. Kô 2004 rachhôh tawhta Aizawl lia Phone a y pathao chyu chyupa hawhta ama reih; Phone number tuachai a hmiatua lâ digit sacharu hmahta 943614 (BSNL) a châ.
A lôhkho bie cha Dâh( Post) siepahliepa ta paphao ta(?), a khonô tawhta â vaw chhyna deikua vaw tlô thai khao tlôh va. A palôh a bua hraw va dâh! A sie awpa zâ bie toti ahlâpa zydua kha a thlathli ta dei châ awpa deikua pasai lei ngaita kaw. Ngâchhih kawpa ta âchhyna hâ hualua ta, khati daihti lia ma a chhôso lyubie thlôhpa nata khochhihpa a vaw chhy cheingei nahta a pangiasana khâchâ ha hra.
Mongyu reih ta vaw tah hra tuasa 'What amazing and adorable love unto her'. A kyhpachâna dâh he ahy chhao rai ta eima chô liata vaw tlô hr'awpa ta eima tlai chhaipa kyhpachâna khochhipa na a châ. A chânopa he vâhnei tah na ta, vâ zydua chhao ahnei.
Kyhpachâna dopa ta kyh pachâ ta chapaw hro nah ta a chanâ ama chu-châpa chhao isi(thik) lei ta, isi cha reilei âno châta angia via rili ta, a palaikhei ngai ta. He hleikhô kyhpachâna khochhihpa nata angiapa vâ ry chhaolei lia a y rai ma!? A chhosô lyubie a vaw chhy n'awpa deikua pahno awpa ta a ngiarohpâ, chihupâ, pahno byuh bâ tlô ta a y cheingei na ta pangiasa âchhih.
A awhsi nô tawhta a kuzô hmô a byuh kawpa deikua a hmô mâh vâ tlyma? A hmô hapa a châ khiah khizaw liata chapaw aly chaipa nata vâhnei chaipa châ aw ta, vâduana vâta ahmô leipa a châ khiah khizaw chapaw liata yru chaipa nata lôlie chaipa a châ thlyu nahta ei pangiasa.
KHÔNO YNA TLÂH ALÂ THAI VEI
1. Kei rairu yru za pai thei vei,
Rohpady na khiahlô âlie tyh;
Khonô hnazô ei vâ ta la,
A chhôso lia eina thei hraw vâ ma
Khonô yna tlâh alâ thai vei
Lyubie toti ei hlâpazy kha;
A chhôso lia âryh hr'aw vâ ma,
Ei hâ tyh a kyhpachâna lyubie.
2. Ngâchhipa ta lyubie cha hâ na
Khonô kuzô hmôpa rai y vei;
Pawmai hrozy mopa kho khai na,
Khâti kei châ aryh thei aw tly.
3. Lailazy ta sikhô tyh hrasa,
Kei châta angia via rili na;
Khâti lyubie ei naw hlâ aw tly,
Chhôso lia a za ngiatiah va na.
He hla sa awpa ta Khôpai tawhta London taih hmah tlua sala Vasty T Azyu hleikhô ei tly awpa pahno hlei hraw va na aw. Na nahthlie mâh vei khiah, nahthlie hra tua rai, Au Gospel tah dâh hawhta, 'Nahthlie la a phana zie na pahno aw tahpa he 100% liata 130% bie ei cha taih'
*********J. Beikuzô*********
No comments:
Post a Comment