CHÂHVÂ A VAW CHHÂ HA NAHTA NA VAW PATHYU MAH Y!

Sa-sa va thatlôna dei châ leipa ta, thlah thatlôna chhao ta chhô nata zâ a dyuh ta,  pahniena nyupi chalo cheingei awpa ta a theina zydua ta thapi a phia. Hmiahao paw chhao chahawh pyly ta adyuna a charia chhaichhi pha chaipa hmâhpa ta he a dyuhna (Battle Field) lia pahniena to cheingeipa âchhuah hra. Adyuhna nata kyhpachâna lia pasaipa leipa nata a thei leipa y tlôh va.

Chhô nata zâ adyuh ei ta, a chadona rai rai y leipa ta ama hmôpa nata ama typa mai cha â chhawh eita ama ka rairi lyma. Hmiahao paw hra a pheisaih pha chaipa nata charia chhaichhi pha chaipa a hmâh ha hra hnai ta, dawh nata minute a pahiepa mai cha nyupi a hnia via ngâ kaw, hiakha lâ nah deikua cha hnôh lâ âsy via ngâkaw ei.


Zâ pasi ta, chhô a rei a tah kaw thlyu nahta ei pangiasa. Varopi ama adyuh tawhta hmiahao paw 'Cancer' cha Kô 1982, September 1 liana kha pahniena to pata Andrew Armstrong cha a rakhô liata khâ hmah pahno khao leipa nata khizaw khaih hmô beih khao lei awpa a thy thlâh haw. Chhôhkha nata sanawhzy mohthli chhao ta thata aw hr'ei sala a vaw chhytuh awpa rai y khao vei ei. Ama chana hla  pyu dei leita he liata su to khao tlôh va.

Andrew Armstrong chhâzaw râh lâta sie noh; thlâ liata ama pabu noh a sawchapaw Billie Joe Armstrong kô 10 pa cha apaw thoby cha mothlih chhao ta mo ta a palôh a pasa ngaita, khizaw liata paw y leipa ta  hro ngâthlâh chypa awpa he a chhâ ypa ta pahno vei. Apalôh a kei chhei thlâh. Apasa na a vaw châ thlyu aw - nô nata paw thina hela.

Chatacha a paw ama buna su tawhta cha mothlih chhaota o lâ pangaipa ta a râ lyma ta, o a tlô patawhnahta a chhôhpadâh (Bed room) lâ a ngia ta, a room cha a khaw hleikhô ta, hrai (Lock) pâ ta, a khôphei chô tawh mothlih chhao ta hmoto nata suto pachâpa ta tlâh to nata va to a  cha hry. He nohta Billie Joe Armstrong khizaw zoh-kaluh hr'aw va dâh hih. A khizaw hi 'Vâ lâ saita asâh, lei mohta po' tah sila a sia chai thlyu na.

Unawh zy, sietanô zy, chhôhkha-sanawh nata viasa zy thina hela tao ru kaw chhao ta, a taona dâh a y via, deikua nô nata paw thina hela khizaw liata so chaipa nata thai chaipa hmah châ sala, tao thaipa nata pahno thaipa na a châ rima vei. Psychiatrist moh pathâ kawpa ama hiahhrina  "Eima nô nata paw he khati daihti lia ma cha ama vaw thi'pa châ ta, kheita maw atahmâ no tawhta tao n'awpa dâh ei vaw pachhuah-panoh aw?"  tah ei ta, cha Psychiatrist moh pathâh kawpa ta cha " Â chhy thei vei na" a tah.

Chata a chhôhpadâh liata a yno, sasyh chhao hmahta ngia âchhie ta, a adadie chaino, a chhie chaino nata apha chaino chhaota a paphasai bei leipa, a nô Ollie Jackson cha Billie Joe Armstrong chhôhpadâh ochhi kiapâh lia a duapa ta a sawchawpa ngiachhiena nata kyhpachâna ta apalôh liata a tu chaphie ngâ nota kâh chhiepâ nâchôta chhôpadâh o chhi cha paroh tu leipa ta  a a ku chavei lâ kuparo sâplih ta chakhy ta,  a sawchapawpa Greenday's Lead Vocalist nata  Guitarist  Billie Joe Armstrong ta 'Kei nô, châhvâ a vaw chhâ nahta na vaw pathyu mah y' tahpa ta a vaw chhy.

Daihti a vaw pahie lymâ ta A paw thi tawhta kô 7 tlai avaw siepa kha a sie chatlie vaw tah kaw ta, chavâh ziza pha liata lôh-mao daihti hmâhpa deikua byuhna rai hnei leipa ta, châhvâ a chhâ nahta tlao na vaw pathyu mah y, khâ a tah thlâh chy.

Like my fathers come to pass
Seven years has gone so fast
Wake me up when September ends

Lôhkipa ta nata phasapa ta y na ta; ei palôh tha a dâh kawno ta chhao, chhâzaw râh lâta ei pahlei hapa ei paw kha my thei leipa na ta, a nohto ta ei pahnona lôhpi lia a vaw thie heih tyh. Heta lôliepa nata lôh kei chheipa ta la châhva ziza pathaipa liata chhao daihti hmâhpa  byuhna rai hnei va na. Châvâh a vaw chhâ ha nahta tlao na vaw pathyu mah y.

As my memory rests
But never forgets what I lost
Wake me up when September ends.

Billie Joe Armstrong he a paw a thi hnôkhô lâ kô 7 a sie tawhta a viasapaw Mike Dirnt nata 'Sweet Children' band padua ei ta, daihti a vaw sie via tawhta he ama band he 'Green Day' tahpa ta a moh ama vaw thla haw. A paw taokheina hla he a kô 20-na liata a phipa a châ. Atahmâ eima rei ngâpa "Wake me up when September ends" hla he kô 2002 liata Green day nah Album ama papuapa 'Shenanigans' liana kha pahlaopa ama chhuah tarawpa ta he hla ama sa awpa châki ta a mothlaw liata a paw hmô tyh ta, a viasa nahzy a ngia tah kaw hra ei sala a ryhpao thai khao leina vâta Kô 2005 liata ama papuapa 'American Idiot' Album liana kha ama vaw pahlaopa a vaw châ.

- 1st September, 2018 ( Saturday)