NÔ HELA NÔ!!!

Thla chaki hlei  nô chhi(womb) liata pahrâ pita, daodo ngâsâpa ta miah chado ei ta; ama daochhuahpazy keimo vâta â ty-o ei ta; ama khona lâ chhao sie-vawh thei leipa ei ta, ama hnei ma, hneilei ma nie pahâhpa torai ta nô chhi liata eima y no ta miah paniesa ei ta, miah ama  padosa.

Chatacha, thla hrawh(10) hmia hmô daihma pata nô chhi tawhta chhiesana khizaw lâ eima vaw pua. Khizaw thiehpa liata rairuna nata palôh riethei hmiachhy bâ hra na daihti cha a vaw tlô haw. He khizaw liata pahrâ awpa ta Zawba chhochhi la 'Ei nô chhi liata vaw thi hawpa ei byu ngaita kaw, chaleipa chhao ta ei vaw pihpa tanahta thi thlâhpa ei khoh kaw' atah pâ ngâkaw.

KHONÔ YNA TLÂH ALÂ THAI VEI

He hla he Pihnô Vasty T Azyu ta thai kawpa ta a vaw sapa kha a châ. Anano ei tah tlyma, a vaw sa ha na tawh arei ha tlai nahthlie beih leipa na ta, Youtube liata hmo ei mo chakhy no ta vaw hmie(Click) tlamaw na ta, cha tawhta nathlie pathao na ta, a ngia ei tah ngaita. Ei hmie( Click) tlamaw lei awpa ei vaw chi kaw.  Nahthlie hra tua rai, a nahthlie pha tu ngâsâ.

Kô 1996 liata Puhpa A. Thazi, Siaha Vaihpi  phipa tahpa hleikhô a thâtih hropa rei awpa pahno va na. A. Thazi he chanô maw a châ chapaw maw, tahpa chhao hmah a tliata lia ei pahno, chatlupo cha na ei pahno lei chu(h).  Art he rônah ta, parôhnasatuhpa hry liata ahlao  hrapa vâta Mara paw hry liata eipa 'Gunda'-sa chai py a châ hra.