LAIKEI MAHPAW

Kô 90 hlei a vaw châ hala a mo zoh kaluh hleikhô ta a nahzy pua pâ khai ha bâ hra,  ie-pazô siekheipa chhao nota leipa a vaw châ haw. A satliano ta sa hluhpi phaoh tyhpa kha atahmâ deikua o chhôh liata awh a vaw ngiapa hmâh lai thei khao vei. Ama daihtino khizaw asosâh mâh leipa vâta chhao a châ ngyu aw, a satliano ta zurie nata sachawh hmie pahâhsa kaw tyhpa kha atahmâ deikua  lao châpa hmah âno châtala thapi phiata niepa a vaw byu haw.  Cha vâta chhao a châ ngyu aw, ama khih zawpi zy za ei ta, "Mahpaw" tah leipa y khao veih ei. Mongyu nah chhochhi la 'Nonagerian'  ama tah kô 90 tloh hapa nah hih. A ngia ei tah dâh la!

Machâ kawpa vâta bie chhao hmah a reih dâh sianô thai khao vei - a ha lao khai vâ chhao a châ ngyu aw - châhrasala a sawnahzy lâthlôh dohpa lia â chhih khai ei ta, ama khih liata 'ano ano' ama tahpa sai amâ vaw châ khai hawh. Chinese bieso liata 'Na sawchapawpa cha ngasa nie dâh hlâta, ngasa patu dâh tlao pachu via mah y" tahpa châ bu lia ei kha hmah reih beih hra vei sala, ano hro liata hrokheituhpa tlao a châ. 'Kei ei reih hlâta la âmo ta ama reihpa vaw nahthlie via tua sa' tahpa lôhpi mohropa nahzy ta pachâna ama vaw hnei mâh hlâta hmâh(Apply) tuapa tlao a vaw châ heih chu(h). He mahpaw halaopa hi mo panaipa a chhuahpa maih asâhzie ama pahno via rili cha maw! Kei cheingei chhao hih ei taochhei ha tyh mâh ta.